Osasun agintariak datuak herriz herri xehatuta ematen hasi zirenetik, koronabirusak kutsatutako 1.723 lasarteoriatar atzeman dituzte, ehun biztanletik bederatzi (%9). Ia denak sendatu badira ere, zoritxarrez, 23k ezin izan dute osatu eta hil egin dira. Iazko martxotik orain artekoan, azaroa izan da kutsatu gehien zenbatu dituzten hilabetea, zehazki, 275.
Hiru kutsatze eskualdean
Astigarragan, Hernanin eta Lasarte-Orian kasu bana atzeman dute asteartean. Andoainen, Urnietan eta Usurbilen, aldiz, bakar bat ere ez. Beterri-Buruntzako hiru herri eremu berdean daude, eta horian beste hiruak, baina 60ko mugatik gero eta gertuago.
EAEko hiru lurralde historikoetan 187 positibo detektatu dituzte ekainaren 22an; horietatik 70, Gipuzkoan. 6.716 PCR eta antigenoen proba egin dira; positibotasun-tasa %2,8 izan da. Autonomia erkidegoko intzidentzia-tasa hiru puntu jaitsi da astelehenekoarekin alderatuta; 108,74 da.
Osakidetzako ospitaleetako plantetan 68 pertsona daude erietxeratuta, eta ZIU unitateetan, sintomak larriagotuta, 40. Asteartean hemezortzi paziente ospitaleratu behar izan dituzte koronabirusagatik.
