Aterpeako lehendakari Miguel Angel Prietok zehaztu duenez, elkarteko kideek uztailaren 19an eta 20an jasoko dituzte kaxak, eta 21ean egingo dute zozketa, asteazkenarekin, Mirentxun.
Zer irabazi dezake kanpainan parte hartzen duten bezeroetako batek? Aterpeako komertzioetan gastatzeko 10 euroko ehun erosketa-txartel, alegia, 1.000 euro. Irabazleak uztailaren 28an xahutu beharko ditu bonu horiek, hiru ordutan, 17:00etatik 20:00etara. Aterpeako kide batek lagunduko du bezeroa, eta autoan joango da berak aukeratutako dendetara. "Establezimendu bakoitzean, asko jota, 100 euro gastatu ahalko ditu saridunak; horrela, bermatzen dugu gutxienez hamar negozio izango direla egitasmo honen onuradun".
Opari-txartelak
Prietok jakinarazi du zenbait komertziotan opari-txartelak emango dituztela beste egun batean gastatzeko: adibidez, ile-apaindegiek eta estetika zentroek. "Uztailaren 28an ez lioke denbora emango irabazleari".
Udalaren izenean Agustin Valdivia alkatea eta Nuria Fernandez Sozioekonomia saileko burua joan dira. Kanpainan parte hartzeko deia egin diete lasarteoriatarrei.