Osasun agintariak datuak herriz herri xehatuta ematen hasi zirenetik, koronabirusak kutsatutako 1.720 lasarteoriatar atzeman dituzte, ehun biztanletik bederatzi (%9). Ia denak sendatu badira ere, zoritxarrez, 23k ezin izan dute osatu eta hil egin dira. Iazko martxotik orain artekoan, azaroa izan da kutsatu gehien zenbatu dituzten hilabetea, zehazki, 275.
Bost positibo eskualdean
Beterri-Buruntza eskualdeko herrietan bost positibo detektatu dituzte asteazkenean: lau Lasarte-Orian, eta bat Astigarragan. Andoain eta Hernani eremu berdean daude; beste lau herriak, horian.
EAEko hiru lurralde historikoetan 190 kasu atzeman dituzte asteazkenean; horietatik 38, Gipuzkoan. 7.692 PCR eta antigenoen proba egin dituzte positibo berriak atzemateko, eta positibotasun-tasa %2,5 izan da. Autonomia erkidegoko intzidentzia-tasa metatuak jaisten jarraitzen du; 132,74 da. LABI batzordea bihar bilduko da, indarrean dauden osasun neurriak berrikusteko. Zenbait moldatzeaz gain, beste batzuk arintzeko aukeraren berri eman zuen Iñigo Urkullu lehendakariak maiatzaren 31n. Horiek indarrean sartzeko baldintzetako bat adierazle hori 150 baino baxuagoa izatea zen.
Osakidetzako ospitaleetan 69 pertsona daude ingresatuta koronabirusagatik; sintoma larriagoak dituzte horietatik 53k, eta ZIU unitateetan daude. Asteazkenean hamar paziente erietxeratu behar izan dituzte, COVID-19a tarteko.
