Aurrekontuen nondik norakoak zehaztu baino lehen alkate Agustin Valdiviak beste alderdiekiko hitzak izan ditu. Pozarren agertu da aurrekontuak gehiengo absolutuari esker onartuak izateagatik eta horregatik, eskerrak eman dizkio EAJ-PNVri.
Era berean, aurrekontu hauek alderdi guztiek landutakoak izan direla nabarmendu du. "Udaltalde guztiekin batu gara. ez behin bakarrik, hiru edo lau bilera egin ditugu batzuekin eta euren proposamenak txertatu ditugu aurrekontuetan. Lanketa hau bai inbertsio plana, bai aurrekontuak zehazteko egin dugu".
Agustin Valdivia alkateak azaldu duenez, "Zirriborroa landua genuen. Duela urtebete aurkeztu behar genituen aurrekontu eta lau urtetarako inbertsio plan estrategikoa, baina pandemiarekin guztia eten zen. Orain, guztia hiru urtetara moldatu behar izan dugu eta pandemiari aurre egiteko laguntzak batu dizkiegu".
Era honetara, Lasarte-Oriak 2021. urtean 35.645.336 euroko aurrekontua izango du, bi ardatz nagusietan banatuta: COVID-19aren pandemiak sortutako sortutako zailtasunei aurre egiteko laguntza lerro ezberdinak eta inbertsioak.
Laguntza eta inbertsio hauek guztiak aurrera eramateko 2020. urteko soberaniaren menpe dagoen arren, udal arduradunak itxaropentsu daude gutxi gorabehera 4.000.000 eurokoa izatea espero dute-eta.
Laguntzak
Udalaren ohiko diru-sarrerak nabarmen behera egin arren, "1.500.000 euro inguru", herritarrei pandemiari aurre egiteko laguntza lerro ezberdinak sartuko dituztela jakitera eman du alkateak.
Babesgabezia-egoeran dauden pertsonentzako laguntzetarako (soberakinaren kargura) |
320.000 euro |
Gizarte-larrialdietarako laguntzetarako |
200.000 euro |
Familientzako laguntzen partidarako |
30.000 euro |
Programa sozialak dituzten elkarteei transferentziak egiteko |
25.000 euro |
Ikasturtearen hasieran eskola-materiala erosteko kanpainarako |
15.000 euro |
Pobrezia energetikoaren kontrako laguntzetarako |
2.000 euro |
Horrez gain, Gizarte Zerbitzuetako arloan, gizarte eta hezkuntzako esku-hartze arloan hazkunde handia emango dela nabarmendu du. "Ia 300.000 euroko igoera egongo da". Izan ere, zerbitzuari behar adina baliabide profesional emateko helburuarekin 439.837 euroko lizitazio berria izango baitu. "Horren bitartez, hiru psikologo izango dira eta zenbait egoeraren prebentzioan ere lan egingo da," zehaztu du alkateak.
Merkataritzarako, ostalaritzarako eta zerbitzu pertsonaletarako zuzeneko laguntzak (soberakinaren kargura) |
400.000 euro |
Lasarte-Oriako establezimenduetan kontsumoa bultzatzeko bonuen kanpaina (soberakinaren kargura) |
200.000 euro |
Beterri-Buruntza eskualdearen garapen agentziako hitzarmena |
272.226 euro |
Establezimendu berriak sortzeko eta ekintzaileei laguntzeko lerroa |
40.000 euro |
Merkataritza Suspertzeko Plan Berezi berriaren idazketa |
30.000 euro |
Merkataritza dinamizatzeko jarduerak sustatzeko Aterpea elkartearekin sinatutako hitzarmena |
25.000 euro |
Bi lerro nagusiez gain, herriko elkarteek hiru urteko hitzarmenak izango dituzte. "Beharrezkoa da gure elkarteek berriro jarduera normalizatu batera bueltatzeko modua izatea. Hiru urterako hitzarmenak, herriko entitateei egonkortasuna emateko eta hiru urtera begira egonkortasun ekonomikoa eskainiko die". Horretarako, 408.583 euro bideratuko ditu Udalak.
Era berean, elkarteek urtean zehar hainbat arloetan (Kultura, Kirola, Gazteria edo Herritarren parte-hartzea) egitasmoak garatzeko 175.851 euroko partida izango da.
Inbertsioak
Hiru urteko inbertsio plan estrategikoaren barruan, 2021. urteari dagozkien inbertsioak, honakoak izango dira alkatearen hitzetan.
Kiroldegi berria eta futbolerako, errugbirako eta atletismorako entrenamendu-zelai berriak dira arlo honetan egongo diren inbertsio garrantzitsuak. Kostua 15 milioi eta 4.223.000 eurokoa izango da hurrenez hurren.
Horretaz gain, "kirola demokratizatzeko asmoz" Urdaburu plazakoaren antzera auzoetan kirol-instalazio txikiak ezarriko du udalak.
Sasoeta auzoko birmoldatzeari amaiera emango zaio Jaizkibel plazako hiru lokalen eraisketarekin. Lan horiek 1.100.000 euroko kostua izango dute.
Era berean, 2020 urteko soberakinaren zati batekin, 382.292 euro, Arranbide eta San Francisco kaleetan baranda berriak jarriko dira. Eta Oriako Karmengo Amaren kapera birgaituko da.
Manuel Lekuona kultur etxeko estalkia aldatuko da, 200.000 euroko aurreikuspenarekin.
975.000 euroko inbertsioa egingo du udalak herriko argiteria LED argietara moldatzeko. "Parke eta plazen argiztapena hobetuko da eta puntu beltzak kenduko dira. Gainera, energia-kontsumoa murriztuko dugu," adierzi du alkateak.
Ikastetxeetan, "gure haurrei ahalik eta zerbitzurik onena eskaintzeko" hainbat inbertsio egingo dira urte honetan:
Sasoeta ikastetxearen sarrera berria |
250.000 euro |
Sasoeta ikastetxeko eremu bat berriz urbanizatzea |
35.794 euro |
Alarmak lau ikastetxetan |
20.000 euro |
Landaberri Ikastolako atariak asfaltatzea |
136.848 euro |
Landaberriko zutoinak eta hesia konpontzea |
18.091 euro |
Landaberri Ikastolarako karpa |
43.202 euro |
Era berean, lan horien guztien gauzatzea Eusko Jaurlaritzako Hezkuntza saileko Udalaguntza laguntzen menpe daudela onartu du alkateak.
Arlo honetan, lau lerro nabarmendu ditu alkateak. Lehena, hondakinen kudeaketari dagokio. Horretan apirilaren 25ean egingo den lurperatutako edukiontzien sistemari buruzko kontsulta eta birziklapenari eta gaikako bilketari buruz egingo den kanpaina garrantzitsua sartzen dira.
Bestetik, herritarrei udal kudeaketak online egiteko aukera eskaini eta BackQ-ren erabilera sustatzeko kanpaina egingo da.
Eta aurrekontuen inguruan izandako prozesu parte-hartzailea hobetzeko pausoak emango dira.
110.000 euroko inbertsioa ere egingo da, Sasoeta Sasoaingo auzo-elkartearentzako lokal bat prestatzeko. "Horri esker, herriko auzo-elkarte guztiek lokala izango lukete," azaldu du alkateak. Horrekin lotuta, Oztabide auzo-elkarteko Arranbide kaleko lokala amaitzear dagoela jakitera eman du eta Zabaleta auzolan elkarteko kideekin Basotxo plazako lokalaren erabilera hitzarmena lantzen ari direla azaldu du. "Behin hitzarmen hori landuta, oinarria izango da udalak utzitako gainerako auzo-elkarteen lokaletarako".
Euskararen arloan, 2020. urtean egin ahal ezin ziren Euskararen Maratoia eta Udako Txokoak aurrera eramango direla nabarmendu du alkateak. Diru partidak honakoak dira:
Udako Txokoak |
122.607 euro |
Euskara ikasteko bekak |
60.000 euro |
Euskararen Maratoia |
50.000 euro |
Euskaraldia |
22.000 euro |
Aldibereko interpretazioa |
40.000 euro |
Dokumentuen itzulpena |
20.000 euro |
Guraso Elkarteei diru-laguntza euskara sustatzeko |
65.984 euro |
Gaztelekuak kalitatezko zerbitzua eskaintzeko asmoz, zerbitzuaren pleguak aterako dira lehiara. "Horietan, besteak beste, gizarte eta hezkuntzako esku-hartze arloan Gizarte Zerbitzuekin egin beharreko elkarlana zehaztuko da," azpimarratu du alkateak.