Beterri-Buruntza eskualdeko herrietan bederatzi positibo detektatu dituzte asteartean: hiruna Hernanin eta Urnietan, bi Andoainen eta bakarra Lasarte-Orian. Hiru herri daude eremu berdean (Usurbilgo tasa, esate baterako, 0koa da), eta beste hiru horian.
EAEko hiru lurralde historikoetan 335 kutsatze diagnostikatu dituzte martxoaren 9an, horietatik 107 Gipuzkoan. 8.274 PCR eta antigenoen proba egin dituzte kasu berriak atzemateko; ehunetik lau testek eman dute positibo.
Koronabirusagatik bezperan baino hiru pertsona gehiago daude Osakidetzako zentroetako plantetan erietxeratuta, 258 guztira, baina ZIU unitateetan dauden pazienteen kopurua jaitsi egin da: 113 astelehenean, eta hamabi gutxiago asteartean, 101. Martxoaren 9an 31 gaixo ospitaleratu dituzte COVID-19a dela kausa.
