"Agenda 21 egitasmoari buruz 2019. urtean egin genuen saioan proposatu ziguten hori ikasleek; uste dugu ongi funtziona dezakeela". Udalak, momentuz, bederatzi edukiontzi erosi dizkio San Marko mankomunitateari, "proba modura". Aurreratu du apirilean egingo dutela lurrazpiko zaborrontzien gaineko kontsulta, eta, galdeketa hori egin bitartean, lurgaineko kontainerrak nolakoak izango liratekeen erakutsi nahi duela. "Herritarren irisgarritasun-baldintzak hobetzea da edukiontzi hauek erostearen arrazoia", azaldu du Lasarte-Oriako Udalak.
Hipodromo etorbidean eta Ola zein Buruntza kaleetan edukiontzi berriak ezarri ditu Lasarte-Oriako Udalak berriki. Kontainer horiek, hondakinak botatzeko ohiko zulo eta sarbideak ez ezik, leiho berezi batzuk dauzkate apur bat beherago, mugikortasun murriztua duten pertsonek edo etxeko txikienek zein adineko pertsonek zabor-poltsak "erosoago" bota ditzaten.
