GAZTEALDIA

Ariketa amaituta, lehen balantzea egin dute Gaztealdia ekimeneko kideek

Zortzi egunez euskara hutsean bizi izan dira Euskal Herri osoko bederatzi gazte, Xabier Karril lasarteoriatarra tartean. Ariketa amaituta, gako batzuk jarri dituzte mahai gainean; analisi sakonagoa egingo dute hemendik aurrera. Hausnarketetako bat, hauxe: "Euskal Herrian euskaraz bizitzeko hautua ez da naturala, ez da norberak estres-maila altu bat asumitu gabe har dezakeen hautua". Hastear den Euskaraldian parte hartzeko deia ere zabaldu dute.

Gaztealdia ekimeneko kideek "arnasguneak eta oztopoak" topatu dituzte azken zortzi egunetan. Lehen multzoan sartu dituzte lantokiak, unibertsitateko ikaskideekin elkarrizketak, herriko plazako tabernak, euskara elkarteak eta herriko gaztetxeetako eskaintza kulturalak, besteak beste. "Eremu horiek indartzea, zaintzea, nabarmentzea eta biderkatzea funtsezkoa da; hau da, boteretzea". 

Ariketa egin dutenek bidean topatu dituzten oztopoen zerrenda ez da laburragoa: saltokiak, udaltzainak, unibertsitateko edukiak eta administrazioko kideak, banketxeak eta tabernetako edo osasungintzako langileak aipatu dituzte. "Funtsezkoa da eremu horiek euskalduntzeko erreminta eta baliabideak jartzea, eta, horretan, pisu berezia dute instituzio publikoek eta hizkuntza politikek". Tresna horietako batzuek, D ereduak eta EiTBk kasu, ez dituzte "beharrezko fruituak" eman, Gaztealdiko kideen aburuz.

Bukatu da Gaztealdia eta bihar hasiko da Euskaraldia. "Gure erronka eta helburua lortzeko bidea hasi besterik ez da egin", nabarmendu dute, euskalgintza "arnasgune horien adibiderik onenetarikoa" dela azpimarratzearekin batera. 

Ohar bidez plazaratu dituzte aurreneko gogoetak, baina datozen egun eta asteetan sakonago aztertuko dute iragan zortzi egunetan bizitakoa. "Gazteok gure bizitza-proiektuaren oinarrian ezarri nahi dugu euskara, eta, horretarako, bederatzi gaztek egin dugun ariketa gainerako gazteen egunerokora zabaldu nahiko genuke". 

Xabier Karril herritarraren bizipenak

Erlazionatuak

Xabier Karril: "Gazteoi ere eragiten digu euskararen egungo egoerak"

Euskara

Xabier Karril lasarteoriatarra izango da gaur hasiko den Gaztealdia ekimenean parte hartuko duen kideetako bat. Euskara hutsean biziko da zortzi eg...