Euskara ikasteko aukera zabala Lasarte-Orian

Euskualdeko euskaltegien ordezkariak, Hernanin, irailaren 4an egindako aurkezpenean. Argazkia: Hernaniko Udala.

Ikasturte berriari hasiera ematear dira herriko euskaltegiak. Udal euskaltegian irailaren 23ra arte egin daiteke matrikula, eta Muntteri AEKn, berriz, hilaren 25era arte.

Euskara ikasteko aukera zabala dago Lasarte-Orian. Udal euskaltegiko eta Muntteri AEK-ko zuzendariek, abiatzear duten ikasturte berriaren berri eman dute, eta udaleko euskara batzordeko lehendakari Jon Antxordokirekin batera, herritarrei dei egin diete euskara ikastera edo hobetzera animatu daitezen. 

Udal euskaltegiko zuzendari Jesus Mari Asurabarrenak gogorarazi du matrikulatzeko epea irailaren 23an amaituko dela, eta, epe horren barruan matrikulatzen diren ikasleek matrikula hamar zatitan ordaintzeko aukera izango dutela. Horrez gain, Gazte txartelaren erabiltzaileek %10eko hobaria izango dute eta beste udal zerbitzuetan bezala, hobaria (%25, %50 edo %75ekoa) edo salbuespena izateko eskubidea duten herritarrek, euskaltegiaren matrikulan ere izango dute.

Eskolak goizez, arratsaldez eta iluntzean izango dira eta maila guztiak eskainiko dituztela ere iragarri dute. Gainera, aurrez aurreko eskoletara joan ezin dutenentzat on-line bidezko autoikaskuntzako eskaintza ere badutela azpimarratu dute.

Muntteri AEK-ko Garazi Zinkunegi zuzendariak ere euren eskolako eskaintzaren berri eman du.Herrian matrikulatzeak abantaila handiak dituela, besteak beste, jendea ezagutzen, herriko harreman-sareetan txertatzen eta herrian egiten diren gauzetan parte hartzen laguntzen duelako.

Euskaltegiko eskaintzari dagokionez, "ordutegi guztietan" eta maila guztiak eskaintzen dituztela gogorarazi du eta aurrez aurreko klaseetara joan ezin dutenentzat autoikaskuntzaren eskaintza ere badutela azpimarratu du. Muntterin matrikulatzeko epea irailaren 25ean amaituko da. 

Bekak

Jon Antxordoki Euskara Batzordeko buruak azaldu du euskaltegietan ikasten aritzen diren herritarrek matrikula-prezioaren %85 arteko beka jaso dezaketela udaletik. Beka horien inguruko zehaztasun eta baldintza guztiak etxebizitza guztietara banatu den diptikoan daudela gogorarazi du, eta jakinarazi, eskaintza berri horri erantzuteko, 2020ko aurrekontua 60.000 eurokoa dela eta irizpide horiekin 2019-20 ikasturtean 146 beka eman berri dituztela.

Erlazionatuak

Euskara ikasi, berme guztiekin

Euskara

Buruntzaldeko udalek euskaltegietako matrikulak ordaintzeko diru laguntzak ematen dituzte, euskara ikastea bultzatzeko. Eskaintza zabala dago eskua...