Aurtengo ikasturtea era presentzialean hasten laguntzeko xedez, Lasarte-Oriako Udalak jakinarazi du zenbait espazio utzi dizkiola Eusko Jaurlaritzaren Hezkuntza Sailari, Eudel Euskadiko Udalen Elkarteak EAEko udalei eskatutakoari erantzunez. Hauek dira: Oztaran eta Kaxkarroko ikastetxeak –honezkero Hezkuntza sailari utzita daude, eta "erabat operatibo"–, Euskaltegi zaharra, Manuel Lekuona kultur etxea eta Gaztelekua. Udalak adierazi du "beharrezkoa" dela zenbait ikasle espazio berri horietan birkokatzea, osasun protokoloan ezarritako baldintzak tarteko, egoerak "normaltasunera itzultzea" ahalbidetzen duen arte.
Kirola egin eta jolasteko
Ekipamendu horiez gain, "kirol jarduetarako zein jolaserako" beste espazio batzuk eskaini dizkio udalak Hezkuntza Sailari: Michelingo kirol-gunea, Loidibarrengo frontoia, Oriako pilotalekua, Zabaletako frontoia eta Mirentxuko trinketea.
"Oso garrantzitsua da ikasleek presentzialki hastea aurtengo ikasturtea, baldintza berdinetan, hezkuntza baita ongizate estatuko oinarrizko zutabeetako bat", nabarmendu du Lasarte-Oriako Udalak ohar bidez. Instituzio guztiek "koordinatuta" lan egin behar dutela azpimarratu du, pandemiak sortutako egoera konpontzeko "bide eraginkor bat" topatu arte.
