Gaur arratsaldean ere kulturaz gozatu ahalko dute lasarte-oriatarrek Andatza plazan. Kresala Dantza Taldeak Ikonografiak ikuskizuna ekarriko du gurera. 19:00etan hasiko da emanaldia, eta sarrera doakoa da edukiera maximoa bete arte, 200 eserleku. Maskara jantzita eraman behar da uneoro.
Gag Street Boys bikote bihurriak emanaldia eskaini du Andatza plazan, eta ez Okendon, udalak hasieran iragarri bezala. Segurtasun eta osasun baldintzak betetzeko aukera gehiago daudelakoan, uztail amaierara arteko kultur ikuskizunak tokiz aldatzea erabaki du. Atzo arratsaldekoa izan zen aurrenekoa. Dozenaka herritar gerturatu ziren, eta gogotik gozatu zuten Iñigo Salinero eta David Gutierrez aktoreen ateraldiekin.
