Goizetik iluntzera, hamabi orduz, janaria eta bestelako oinarrizko produktu batzuk bildu dituzte Lasarte-Oriako ostalariek, Gurutze Gorriarekin eta Lasarte-Oriako Udalarekin elkarlanean. Okendo plazako arkupeetan jarri zuten postu nagusia atzo, eta beste zenbait kutxa ere bai herriko supermerkatuetan. Antolatzaileen esanetan, beraiek egindako "aurreikuspen guztiak" gainditu ditu herritarrek eta elkarteek emandako laguntzak. 37 kutxa bete dauzkate Gurutze Gorrikoek biltegietan, Lasarte-Oriakoan eta Urnietakoan.
Fase aldaketa eta bilerak
Herriko zenbait ostalarik atzo eta gaur jarri dituzte euren negozioak martxan: terrazak atera dituzte batzuek, eta etxez etxeko zerbitzua martxan jarri beste batzuek. Espainiako Gobernuak iragarritako neurriak eskuetan, lehen fasekoak –gehien jota terrazako mahaien erdiak jartzea, segurtasun distantziak mantenduta eta lokal barruan bezerorik ez artatzea, besteak beste–, tabernari ugarik erabaki dute pertsiana ez altxatzea oraindik.
Udalarekin biltzen ari direla jakinarazi dute. Bi egin dituzte honezkero. Guztien artean adostu ostean, hauek dira alkateari helarazi dizkioten eskaeretako batzuk, "epe motzean herriko ostalaritzaren etorkizuna bermatzeko".
