DANTZAREN NAZIOARTEKO EGUNA

Dantzaren Nazioarteko Eguna ospatzeko beste modu bat

Txintxarri Aldizkaria 2020ko api. 29a, 12:31

Herritarrek eta eragileek ezingo dute aurtengo Dantzaren Nazioarteko Eguna kalean ospatu. Koronabirusak eragindako egoera dela eta, euren etxeetan konfinatuta daude, eta bide berriak asmatu beharko dituzte gaurko egun bereziaz gozatzeko. Kukuka antzerki eta dantza eskolak, esate baterako, bideo bat prestatu du, iazko ospakizunean TXINTXARRIk ateratako argazkiak eta Gregory Vuyani Maqoma artistak idatzitako manifestua uztartuz. Honela dio:

"Duela gutxi egin nuen gogoeta sakon bat dantzari buruz, elkarrizketa batean. Zer esan nahi du niretzat? Nire erantzunean nire bidaia aztertu behar izan nuen, eta konturatu nintzen dena erronka bat dela; egunero erronka berri bat aurkezten duela, aurre egin behar zaiona, eta dantzaren bidez saiatzen naiz munduari zentzua ematen.

Ezin imajinatuzko tragediak bizitzen ari gara garai honetan, gizagaixo aro bezala hobe deskriba nezakeen garaian. Inoiz baino gehiago dantza egin behar diogu munduari gogorarazteko elkartasuna oraindik badela. Gure dantzak inoiz baino gehiago erakutsi behar die munduko buruzagiei, giza baldintzak zaintzea eta hobetzea agintzen zaienei, pentsalari amorratuen armada garela eta gure asmoa mundua urratsez urrats aldatzen ahalegintzea dela.

Dantza askatasuna da, eta horren bidez askatu behar ditugu besteak munduko hainbat txokotan aurrez aurre jartzen dituzten tranpetatik. Dantza ez da politikoa, baizik eta politikoa bihurtzen da, bere zuntzean giza lotura bat daramalako, eta, beraz, giza duintasuna berrezartzeko ahaleginaren inguruabarrei erantzuten dielako.

Gure gorputzekin espazioan erori eta elkarrekin korapilatzen garen heinean, mugimendu indar bihurtzen gara bihotzak ehunduz, arimak ukituz eta hain desesperatuki beharrezkoa den sendabidea emanez. Eta erronka dantza bakar, garaiezin eta zatiezin bihurtzen da. Orain behar dugun guztia pixka bat gehiago dantzatzea da!

Erlazionatuak

Maiatzaren Lehena, dantzaren eguna

Iñigo Gonzalez Sarobe 2019 mai 01 Kultura