Gaurko azoka, iruditan

Txintxarri Aldizkaria 2020ko api. 29a, 11:59

Goizeko bederatzietarako azokara noiz sartuko zain zeuden herritar goiztiarrenak. Ez dira Kale Nagusira joan, Loidibarren pilotalekura baizik; bertara lekualdatu ditu postuak udalak, "inguru kontrolaerraza" delako, eta "ahalbidetzen duelako koronabirusaren pandemiak behar dituen segurtasun eta higiene neurriak mantentzea". Hamahiru saltzailek jarri dituzte postuak frontoian, 13:00ak arte.

Koronabirusak eragindako egoera aldatzen ez den bitartean, asteazkenetako azokak beste itxura bat izango du. Saltzaileek ez dituzte eskainiko euren produktuak Kale Nagusian, Brigitarren plazan eta Ola kalean, Loidibarren pilotalekuan baizik. Aldaketa horrek ez ditu herritarrak despistatu, eta goizeko bederatzietatik hasi dira saskiak eta karruak produktu freskoekin eta bestelakoekin betetzen.

 Hesiak eta zintak erabili dituzte udaltzainek erosleak antolatzeko. Hamahiru postu egon dira gaurko azokan. Horietako bi, baserritarrenak, frontoiaren ondoan dagoen padel pistan jarri dituzte. Loidibarrenera hurbildu ahala, baserritarrengana joateko, hesietatik igarotzen hasi eta ezkerretara egin dute erosleek. Kanpoan, ohar bat irakur zitekeen: Gehienez bi pertsona postu bakoitzeko. Beste 11 postuak frontoian bertan jarri dituzte: gazta, hestebeteak, ukenduak, barazkiak eta frutak...oinarrizko elikagaiak erosi ahal izan dituzte herritarrek. 

Udalaren oharra

Lasarte-Oriako Udalak jakinarazi du asteazkenetako azoka Loidibarrenen egiten jarraitzen den bitartean, herritarrek libre utzi beharko dituztela frontoiaren ondoan dauden aparkalekuak, postuak jartzen dituztenek bertan aparka ditzaten euren ibilgailuak, 07:00etatik 13:00era. 

 

Erlazionatuak

Bueltan da asteazkenetako azoka

Txintxarri Aldizkaria 2020 api 27 Gizartea