Otsailaren 27a. Ibon Fernandez Iradi preso lasarteoriatarraren kasuan mugarri izan daitekeen egun bat. Egun horretan deliberatuko du Parisko Dei Auzitegiak haren zigor-etete eskaerari buruz: aske utzi, edo espetxean jarraitzera behartu. Larriki gaixo dago herritarra; esklerosi anizkoitza diagnostikatu zioten 2013an, lehen sintomak lehenago pairatzen hasi bazen ere.
Zigorrak Ezartzeko Frantziako Auzitegiak azaroan ebatzi zuen lasarteoriatarraren eritasun larria eta kartzelan segitzea ez zirela bateragarriak; erabaki horren berri jakin bezain laster jarri zuen helegitea prokuradoreak. Ez da lehenengo aldia herritarrak bere zigorra etetea eskatzen duena; 2014an horren alde egin zuen auzitegi horrek, baina Dei Auzitegiak eta Kasazio Gorteak kasua berrikusi ostean, erabaki zuen bertan behera uztea eskari hori.
