Dominak pilatzen ari da Asier Sagasti seniorra. LOKEko judokak bi aste daramatza podiumetik jaitsi gabe: pasa den larunbatean brontzea kolkoratu zuen Eibarren, Euskadiko Txapelketan; astebete lehenago, berriz, urrezkoa, Hernanin jokatutako Gipuzkoakoan. Hiru borrokaldi jokatu zituen Sagastik Eibarren. Bere taldekide Fermin Baldak ere konpetitu zuen txapelketa horretan. Hatz-mamiekin ukitu zuen brontzea berak ere, baina galdu egin zuen borrokaldi erabakigarri hori. Almi Campos kadetea ere lehiatu zen Eibarren.
Infantilen txanda iritsi zen ondoren. Gipuzkoako Taldekako Txapelketa jokatu zuten Unai Guisadok, Iker Izquierdok, Ekain Luisek, Aitor Santosek, Unax Urangak eta Julen Ugartek. Bikain aritu ziren guztiak, eta urrezko domina poltsikoratu. "Maila handia dutela erakutsi dute guztiek", nabarmendu du Gorka Aristegi entrenatzaileak.