BAT taldearen filiala da Ostadar SKT eta, horregatik, urdin-beltzek euren harritxoa jarri zuten lehiaketan. Gallegok jauzi hirukoitzean parte hartu zuen. 10,78 metrotako jauziarekin bere marka ondu eta bosgarren postua eskuratu zuen atleta gazteak. Redondori dagokionez, 100 metro hesi proban zortzigarren izan zen, 16,52 segundoko marka eginda.
Nazioarteko krosa
Hurrengoak lokatzera ateratzen, Donostiako Nazioarteko krosean parte hartuko duten atletak izango dira. Azaroaren 1ean, igandearekin lehiatuko da proba Hipodromoan eta Ostadar SKTk ordezkaritza zabala aurkeztuko du; 35 kidek egingo dute korrika.
Maila ezberdinetan izango dira lehian: benjamin, alebin, infantil eta federatuak. Eta euren onena emango dute Euskadiko Krossak proiektuko jardunaldian.
Beste herritarrik ere izango da pistan, hala nola Zumeatarrako Aimar Sukunza edo Mari Carmen Olaso beteranoa.
Teknifikazio saioa
Horretaz guztiaz gain, hilaren 30ean eta 31n, proba konbinatuetan dabiltzan kirolarien teknifikatzeko saioak eta hitzaldiak egingo dira Atsobakar kirol gunean.
Hector Gonzalez RFEAko arduraduna izango da jardunaldiak zuzentzen eta bisita berezi bat ere izango dute entrenamendu horietan parte hartzen duten kirolari zein Ostadar SKTko kideek: 2016ko Olinpiar Jokoetan altuera jauzian urrezko domina lortu zuen Ruth Beitia ezagutuko dute.
Korrikalariak, lehian
Krosa lehiatu zuten hilaren 25an herrian, baina izan zen beste probarik ere. Donostian Salto15 K eta 5 K proba jokatu ziren eta guztira hogei bat herritarrek parte hartu zuten. Proba luzean Endika Tudero (01.09.16) eta Mari Carmen Olaso (01.12.49) izan ziren lehenak. Patintzaileetan ere izan zen ordezkaririk, Javier Vargas (37.29).
Bestalde, Zornotzako krosean Zumeatarra taldeko Aimar Sukunzak 29.49 denbora behar izan zuen ibilbidea egiteko.