Kale Nagusiko 40. zenbakian dute egoitza Biyak Bateko lagunek. Estaltzeko toki gehiegirik ez duen eraikina da, euritik gutxi babesten duena. Hori, ordea, ez da Adinekoen Omenaldi Asteari giro ederrean ekiteko oztopo izan: bertaratu direnek bandera igota eta trikitixaren doinupean kalejira eginda topatu dute aterpea. Horren aurretik, elkarteko presidente Lucia Muñozek hartu du hitza: "Lasarte-Oriaren historiaren funtsezko zatia gara adineko pertsonok; aste honetan zehar elkartzea eta bizitza ospatzea dagokigu".
Hugo eta Judith gazteek girotu dute hasiera ekitaldia: eskusoinua jo du aurrenekoak eta aurreskua dantzatu du bigarrenak. Espaloia bustita zegoela-eta, elkarte barruan aritu da, fin-fin. Ondoren, artistak eta ikusleak, denak sartu dira gela batera, sabelak bete eta eztarriak freskatzera.
Egitaraua, egunez egun
Hilak 2, ostirala
- 11:00etan, Okendo plazatik abiatuta, Ondo Ibili ibilaldi osasuntsua jarduera.
- 12:00etan, Antonio Mercero aretoan, ibilaldian parte hartu dutenentzako luntxa.
- 19:00etan, kultur etxean, Biyak Bat koruko kideen emanaldia.
Hilak 3, larunbata
- 09:30ean, Okendo plazatik abiatuta, Ibilaldi Neurtua jarduera.
- 18:30ean, Oriarte Landaberri institutuko patioan, Epsilon taldearen kontzertua.
Hilak 4, igandea
- 12:30ean, San Pedro parrokian, meza.
- 14:00etan, Michelin kirol gunean, bazkaria eta ondorengo dantzaldia, Trio Galea-ren eskutik.
Hilak 5, astelehena
- 10:00etan, Maialen Chourraut kiroldegian, gimnastika erakustaldia.
- 16:00etan, Biyak Bat egoitzan, mugikortasun jokoak.
Hilak 6, asteartea
- 17:00etan, Isla plazan, dantza erakustaldia.
Hilak 7, asteazkena
- 18:00etan, Biyak Bat egoitzan, jokoetako sari banaketa eta txokolate jana.
Hilak 8, osteguna
- 10:40ean, Biyak Bat egoitzatik abiatuta, Ama Brigitarren komentura arteko kalejira.
- 11:00etan, Ama Brigitarren komentuan, meza.
- 12:00etan, Biyak Bat egoitzan, opari banaketa urrezko ezteiak bete dituztenei.
- 14:30ean, Herriko Etxea jatetxean, bazkaria. Ondoren, dantzaldia, Niko DJk jarritako doinuekin.
