Bost probari egin zieten aurre lehiakideek: 100 kiloko bola altxatzea, giza proba, aizkora, txingak eta korrika.
Telleria ederki moldatu zen harria jasotzen eta hirugarren amaitu zituen hamar altxaldiak. Giza proban ere postua mantendu zuen, baina aizkora lanean Jokin Urretabizkaia Basozabal-ek aurreratu zuen. Txingak amaitzean gertu zuen Ioritz Gisasola Zelaia IV.a eta bizkaitarrak lasterka aurreratu zuen herritarra. Helmugan, beraz, bosgarren denborarik onena eskuratu zuen Lasarte-Oriako kirolariak (14.32) eta irailaren 26an Azpeitiko zezen plazan jokatuko den finalerako txartela eskuratu zuen.
Berarekin izango dira lehian Andoni Iruretagoiena Izeta VI.a, Xabat Olaizola, Basozabal, Zelaia IV.a eta Julen Kañamares.