Lasarte-Oriako Udalak Manttangorri hiri busaren zerbitzu berezietako gaueko tarifa kenduko du, eta, horrela, Gipuzkoako Foru Aldundiko Mugikortasun, Turismo eta Lurralde Antolamendu Sailak Lurraldebusen sarerako bultzatutako neurrira egokituko ditu udal tarifak. Hala, gauez egiten diren joan-etorriek eguneko ordutegian egiten direnen kostu bera izango dute, eta garraio publiko eskuragarriagoa bultzatuko da herritarrentzat.
Neurri hori udalak Manttangorriren bidez urtean zehar programatzen dituen gaueko zerbitzu berezietan aplikatuko da. Horren adibiderik berriena, San Pedro Jaietan prestatutako zerbitzua izan da. Gau osoan zehar zerbitzua eskaini zuen, udalerriko auzoen arteko joan-etorrietarako alternatiba segurua ahalbidetuz.
Horren gainean, honako adierazpenak egin ditu Agustin Valdivia alkateak: "Erabaki hori garraio publikoaren erabilera sustatzeko egiten ari garen lanaren ildotik dator. Zerbitzu segurua, erosoa eta merkeagoa eskaintzeak ibilgailu pribatua etxean uztera animatzen du, eta gaueko ordutegietan edonor lasai ibiltzeko aukera ematen du".
Zerbitzu Publikoetako zinegotzi David Mateosek, berriz, honako hitzartzea egin du: "Manttangorri zerbitzu bereziekin indartzen dugun bakoitzean, mugikortasunerako benetako alternatiba bat eskaintzea bilatzen dugu. Orain tarifak Aldundiak hartutako erabakira egokitzeak aukera ematen du zerbitzu horiek erakargarriagoak eta eskuragarriagoak izan daitezen herritarrentzat".
Hala, udalak gogorarazi du aldaketa hori Manttangorri hiriko autobusaren gaueko zerbitzu berezi guztietan aplikatuko dela, urtean zehar programatzen direnetan, eta, horrela, bizilagunentzat "seguruagoa, jasangarriagoa eta irisgarriagoa" den mugikortasun eredu bat indartzen lagunduko dutela.