Lehena tapizera ateratzen Aiala Jimenez izan zen. Hilaren 23an, Euskadiko Kirol Jokoetan parte hartu zuen infantil A kategorian gazteak, Eskoriatzan. Soka eta uztaiarekin egin zuen lan LOKEko ordezkariak eta maila handiko lehia izanik, ezin izan zuen lehen postuetan egon.
Hurrengo egunean, Jubenil A eta B mailako taldeek Amateur kategoriako Euskadiko txapelketako lehen saioari egin zioten aurre; mazoekin egin zuten lan.
Lehenen kasuan, seigarren postuan amaitu zuten lehia. Entrenatzaileek azaldu digutenez, astean zehar gimnasta batek min hartu eta kide berri bat sartu behar izan dute: "Osaera berriarekin bi entrenamendu bakarrik egin ahal izan dituzte. Hala ere ongi erakutsi dute egindako lana".
B mailako kideei dagokionez, hamahirugarren sailkatu ziren. Tresna horrekin lan egiten duten lehen urtea dela nabarmendu dute elkarteko prestatzaileek: "36 talde ziren eta postu onean amaitu dute mazoekin lehen urtea izateko".
LOKEko arduradunak pozarren daude gimnasta guztiek urtean zehar egindako lanarekin: "Kode berria izan dugu bai kirolari, bai entrenatzaileentzat. Gainera, jubenilek ere tresna berriari egin diote aurre".
Baina ez dira lehiaketak amaitu, hilaren 30ean, Amateur mailako bigarren saioan, Kadete B taldea izango da lehian.