Atletico Madril eta Real Sociedaden arteko Errege Kopara joan baino lehen agur berezia izan zuen kuadrillakoen partetik, Sanseko Lander Astiazaran jokalaria barne eta ez zuten hutsik egin Sevillan ere.
Finaleko jokalaririk gazteena izan zen (atzo 20 urte bete zituen), baina sendotasunez eta seriotasunez aritu zen jokoan. Herritarra horma bat izan zen eta Griezmann, Alvarez, Sorloth eta Le Normandek herritarraren presioa sufritu zuten; airezko baloietan ez zuen huts egin.
Ederki ospatu zuen Marinen azken penaltia eta Kopa eskuratu izana. Jokalari eta taldeko ordezkariek zelaian zaletuei babesa eskertu zieten kopa batetik bestera eramanaz. Lasarteoriatarrak, gainera, futbolean lehen pausoak ematen ikusi zuen Ostadar SKT izan zuen gogoan zelaian eta herriko taldeko bandera jantzi zuen. Zelaitik kanpo, kuadrillakoekin besarkada eta kantuak, ezin falta.
Jaia, Donostian
Zelaian zein hilaren 19an itzulerako bidaian realzaleen berotasuna sentitu ahal izan zuten guztiek, baina atzo Donostian bizi izan zen ospakizun handia.
Horretan Martinez gain, Astiazaran herritarra ere izan zen jokalarien autobusean. Realak kopa eskuratzeko bidean parte hartu duten jokalari guztiak gonbidatu zituen jaira. Astiazaranek 2025eko abenduaren 16an Realarekin debuta egin zuen Kopako final zortzirenetan Eldan (Alacant, Valentzia) Jon Ansotegiren eskutik.
Donostiako kaleak jendez lepo zeuden; 100.000 bat pertsona inguru batu ziren erakunde ofizialen datuen arabera. Autobuseko aurrealdean kopa ikusgai jarri eta jokalariek zaletuak agurtzen eta kantuan egin zuten Anoeta eta Udaletxe arteko ibilbidea.
Erakundeetako ordezkariekin bildu eta Udaletxeko balkoitik jendeari hitz batzuk esan edo kantuan ere aritu ziren jokalari eta Matarazzo entrenatzailea. Festak udaletxe aurrera jaitsi zirenean jarraitu zuen eta, esate baterako, Aritz Elustondok bana jokalariak aurkeztu zituen. Honako hitz hauek esan zituen Martin herritarraren txanda izan zenean: "19 urte. Eta ze finala!". Eta denbora agortzear zelako, Astiazaran barne hartzen duen harrobiko jokalarien kasuan zera aipatu zuen: "Hau guztiaren parte dira, Realaren oraina eta etorkizuna".
Jai giroa ezin izan zen zaletuak nahi adina luzatu, Realak Getaferen aurka neurtu behar ditu bihar indarrak eta hori prestatzeko gaur goizean entrenamendu saioa egin dute Zubietan.