Igerilariak, ederki Euskal Herriko txapelketan zein Gipuzkoako Neguko Sarian

Txintxarri Aldizkaria 2026ko otsailaren 27a

Bi txapelketatan parte hartu zuten igerilarietako batzuk, Hernani Sarian. Arg.: Buruntzaldea IKT.

Lasarte-Oriako igerilariek bi hitzordu garrantzitsuri egin zieten aurre hilaren 21ean eta 22an: Euskal Herriko txapelketa, Iruñean (Nafarroa) eta Gipuzkoako Neguko Saria, Zarautzen. Igerilari gazteak bikain aritu ziren lehen postuetan egoteaz gain, marka ugari ondu zituzten

Absolutu eta junior mailako Euskal Herriko txapelketan Buruntzaldea IKTko Amaiur Iparragirre eta Ane Meyer zein CD Fortuna taldeko Ibon Elola, Kimetz de la Cruz eta Mayi Gorostegi herritarrek parte hartu zuten.

Estilo libre, bizkar zein lau estiloko probetan izan ziren uretan eta lehen postuetan egotea lortu ez bazuten ere, Iparragirrek, Elolak eta De La Cruzek euren markak hobetu zituzten behean ikusi ahal den lehiatan.

Ondutako markak

Amaiur Iparragirre (Buruntzaldea IKT):
- 50 m. libre.
Ibon Elola (CD Fortuna):
- 200 m. libre.
Kimetz De La Cruz (CD Fortuna):
- 50 m. bizkar.
- 100 m. bizkar.
- 200 m. bizkar.

Dominak eta markak

Gipuzkoako Neguko Sarian ere emaitza ederrak lortu zituzten igerian egin zuten Buruntzaldea IKTko hamar ordezkariek eta guztira, hiru domina batu zituzten.

Ander Martinezek infantil mailako 100 metro bular proban denborarik onena egin zuen eta urrezko domina jantzi zuen. Aitor Estanga hirugarren izan zen junior/absolutu mailan eta Aiala Erro infantil mailako podiumetik gertu geratu zen 200 m. libre lehiaketan.

Horrez gain, 100 m. lau estilo proban igeriketa taldeko ordezkaritza handia izan zen. Zazpi kide izan ziren lehian; lau infantil kategorian eta hiru absolutu/junior mailan. Bi probetan lehen postuan izan ziren igeriketa taldeko kideak; Itxaso Iparragirre bigarren izan zen gazteen artean eta Nora Miguelez laugarren, handienen artean. Eta beste batzuek euren denbora hobetzea lortu zuten.

Dominak

Ander Martinez (Buruntzaldea IKT):
- 100 m. bular - 1º Infantil.
Itxaso Iparragirre (Buruntzaldea IKT):
- 100 m. lau estilo - 2º Infantil.
Aitor Estanga (Buruntzaldea IKT):
- 50 m. bizkar - 3º Junior/Absolutua.

Ondutako markak

Aitor Estanga (Buruntzaldea IKT):
- 50 m. bizkar.
Nara Larretxea (Buruntzaldea IKT):
- 100 m. lau estilo.
Izaro Baurtista (Buruntzaldea IKT):
- 100 m. lau estilo.
June Apeztegia (Buruntzaldea IKT):
- 100 m. lau estilo.
Nille Becerra (Buruntzaldea IKT):
- 100 m. lau estilo.

Bakarkako saioez gain, bi errelebo ere egin zituzten taldeko neskek: 4x50 m. libre eta 4x50 m. lau estilo.

Hitzordu garrantzitsua

Eta neguko sasoiko lehiaketa garaia ez da amaitu oraindik; hilaren 28 eta martxoaren 1ean infantil mailako Euskal Herriko txapelketa jokatuko da Getxon (Bizkaia). Buruntzaldea IKTko Lier Garmendia eta Tolosaldea IKTko kide Patxi Arzalluz herritarra launa proban ariko dira igerian. Garmendiak tximeleta estiloko 50 m. eta 100 m. saioak egingo ditu, baita 50 m. libre eta 100 m. bizkar ere; Arzalluzek, aldiz, 50 m., 100 m. eta 200 m. libre eta 100 m. tximeleta.

Kirola