Jakinarazi dute otsailaren 15a (igandea) izango dela Oporrak Bakean programaren aurtengo aldian izena emateko azken eguna. Hori egiteko bide hauek dituzte familiek: www.oporrakbakean.eus webgunea, oporrakbakean@gmail.com helbide elektronikoa edota 696 01 47 86 telefonoa. Aipatu egitasmoaren bultzatzaileek sendiak animatu dituzte euren bizitokietako ateak haur sahararrei zabaltzera, bizi diren artean ahaztuko ez duten esperientzia izango delako.
Oporrak Bakean programaren sustatzaileek gogorarazi dute 10 eta 12 urte arteko haur sahararrentzat "behar-beharrezkoa" dela basamortuan dauden errefuxiatuen kanpalekuetatik ateratzea eta udara Euskal Herriko harrera familiekin igarotzea: "Berotik babestu, ongi elikatu, medikuarenera joan, beste kultura, hizkuntza eta bizimodu batzuk ezagutu... Egitasmoak onura horiek guztiak ditu". Hori horrela, ekimenean parte hartzea "arnasgune" bilakatzen da gaztetxoentzat nahiz horiek etxean hartuko dituzten sendientzat. Oinarri hori erabili dute aurtengo kanpainaren leloa aukeratzerakoan: 50 urtez gure ateak zabalik eta esperantza bizirik.