Bakarrik, kuadrillan edota taldean ugari izan dira goizean zehar Buruntzara igotzera animatu direnak. Sorgin Jaiak-ek, adibidez, 09:00etan jarri du hitzordua Zubipeko biribilgune parean eta sorginak giro ederrean igo dira, ttipi-ttapa. Tontorrera ailegatu direnean talde argazkia atera dute Sorginkeria bizirik eta aske! Ez dadila akelarrea eten lelodun kartelarekin. Iristear den urtea berezia izango da beraientzat, gure herrian festa eredu alternatibo eta herrikoia posible dela erakusten hasi zirenetik 25 urte beteko direlako.
Esan bezala, indarrak hartzeko eta goxatzeko aukera izan dute mendizaleek San Roke baselizaren alboan dagoen aterpean, tontorretik Andoain aldera jaitsi eta metro batzuetara. Salda, txorizoa, txokolatea, freskagarriak... eta baita trikitixa eta panderoa ere, hamaiketakoa egin bitartean ederki dantzatzeko.