Eszenatoki gainean lagun izan dituen hiru kideei koloretako sudur bana oparitu die sudurgorriak. Olentzerori, beltza, "ametsen kolorea"; Mari Domingiri, horia, "argia eta beroa" irudikatzen dituena; Xixuko ahateari, urdina, "zerua, gure teilatua eta Lasarte-Oria harrera herria" dela sinbolizatzeko; eta Porrotxek berak, ba gorria, nola ez: "Alaitasuna, maitasuna eta elkartasuna".
Hori guztia eta gehiago oparitu diete lau protagonistek Oriarte Landaberri lepo bete duten familiei. Irri, kantu eta, batez ere, dantza egin dute: galtzagorriak, animaliatxoak, Mari Domingiz mozorrotu diren gaztetxoak, Jalgune elkarteko lagunak... den-denak batu dira festara.
Ongietorriaren egitaraua beteta, atseden hartu eta gaueko banaketari ekingo diote herritarrak oheratzen direnean eta (batzuek behintzat) parranda botatzen duten bitartean. Badakizue, azken uneko sorpresarik izan ez dezazuen, txintxoak izan!
