Petoak, kamisetak, jertseak, biserak... eta baita galtzerdiak ere! Kolore berezia hartu du Muntteri AEK euskaltegiak Kolorea, eta usaina ere bai: 24. Korrikarena, hain justu ere. 'Euskara gara' lelopean Euskal Herria alderik alde zeharkatuko duen euskararen aldeko ekimen erraldoi hori prestatzen hasiak dira Geltoki kaleko 17. zenbakiko bulegoan. Lasterketa martxoaren 19tik 29ra aurrera eramango dute, Atharratzetik Bilbora. Lasarte-Oriatik noiz igaroko den iragarriko dute, baina ez orain, urte berria hasterakoan baizik.
Horren aurretik, esan bezala, ari dira lanean, jo eta fuego. Batetik, jakinarazi dute produktuak salgai dituztela bulegoan bertan eta herritarrek 10:00etatik 13:00etara edo 16:00etatik 18:00etara eros ditzaketela. Horrez gain, martxoko ekimenerako kilometroak erosi nahi dituzten norbanakoek zein eragileek aukera dute jadanik horretarako; "lehenbailehen" egitea aholkatu diete.