Emanaldiarekin hasi aurretik, Jalguneko kideek Manuel Lekuonara gerturatutako askoren besarkadak jaso zituzten. Irribarretsu eta oholtzaratzeko irriketan ziren jalgunetarrak; kamararen objektiborik ikustean, poserik onena jartzeko prest.
Aurtengo jaialdiaren leloa honako hau izan zen: Aniztasuna, gure indarra. Bea Egizabal eta Cesar Marcos aritu ziren aurkezle lanetan. Jaiarekin hasteko, kide bakoitza eszenatokira igo eta aurkeztu egin zen. Berariazko kanta bat bidelagun zutelarik, publikoaren txalo zaparrada itzela jaso zuten denek. Hori ez ezik, euren argazkiekin apaindutako paperez osatutako marea ere ikusgai izan zuten. Izan ere, aurtengo berrikuntza izan zuten Jalguneko kide bakoitzaren argazki bana publikoaren eserlekuetan ipini zituztela, bertan agertutako pertsona oholtzaratzean, paperari eragiteko. Batzuk hizketarako gogoa izan zuten, beste batzuk ez. Partekatu ala ez, publikoaren barrea eragin zuten.
Ustez baino gehiago luzatuta, aurkezpenaren jarraian, Erketz Dantza taldekoekin batera arin-arina eta fandangoan aritu ziren, kalejirarako tartea ere izan zuten. Ondotik etorri ziren Extremadura Etxeko kideak euren herrialdeko dantzen erakustaldia egitera. Extremaduratik hegoalderuntz jarraituta, Semblante Andaluzen txanda izan zen. Instrumentuak eta Semblante Rociero abesbatza lagun zituztelarik, sevillanak dantzatu zituzten.
Txalo artean, herriko sudurgorriak agertu ziren: Porrotx eta Marimotots. Marimototsek egindako truko batzuekin batera, Pausoka pausoka dantzatu zuten. Dantzatzeaz gain abestea ere gustuko dutelako, Jalguneko kideek karaokea ere entonatu zuten. Begiraleekin dantza eginez amaitu zen jaialdia. Talde argazkia egin, eta oholtzatik jeitsi ziren jalgunetarrak jaialdiaren bigarren parteari hasiera emateko, hots, hurkoekin batera larunbat iluntzea pasatzeko.