Urtea amaitzear dela, Sarek urtearen gaineko gogoetari ekin dio, azaroan antolatutako Azken Ostiral ekimenean. Aurrera urratsak "nabarmenak" izan direla-eta, urtea "oparoa" izan omen da. Hori dela-eta, aitortu zuten "guztiak etxeratzearen helburua" inoiz baino gertuago dela, nahiz eta etxeratze prozesua nahi baino "mantsoago" ematen ari. Euren ustez, aurrera pauso horiek "auzoz auzo eta herriz herri" urte osoan zehar emandako mobilizazioen emaitza dira, hots, "euskal gizartearenak". Ildo beretik, azken hilabeteetan jazotako mobilizazio batzuk izendatu zituzten; urriaren 18an Bilboko Euskalduna Jauregian egindako II. Konferentzia, besteak beste.
Orain arte egindako lana balioan jarri ostean, aurrera begira zer aldarrikatua ere badutela gaineratu zuten. Izan ere, Ezin da gehiago lelopean, abenduko eta urtarrileko mobilizazioak antolatuko dituzte behin betiko konponbidea aldarrikatzeko, "sufrimenduak, egiak, aitortzak, erreparazioak, konponbideak, bakeak eta elkarbizitzak" ezin direlako gehiago luzatu. Horrenbestez, negu honetan ere, adierazi zuten euskaldunek erakutsi behar dutela prest direla "ondorioak atzean utzi eta etorkizunari begira jartzeko". Behartzat jotzen dutenez gizarteak iraganarekin apurtzea eta aurrera egitea, uste dute elkarbizitza agertokiak eskuratu ahal direla askotariko biolentzien biktimen aitortzarekin eta euskal preso, iheslari eta deportatuen etxeratze prozesuarekin. Hortaz, helburu horren alde mobilizatzen jarraituko dute.