Nafarroa erdi eta hegoaldeko euskalgintzak bultzada nabarmena jaso du Errigora egitasmoaren barruko Euskarari Puzka kanpainaren bidez. Lasarte-Oriako boluntario taldeak herritarrek eskatutako kaxak banatu berri ditu eta, adierazi duenez, aurtengoa izan da inoizko ekarpenik handiena, ez soilik gure udalerrian, baita Euskal Herri osoan zehar ere. Horri lotuta, honako mezu hau zabaldu dute: "Zorionak eta mila esker, bihotzez! Jarrai dezagun tantaz tanta eta auzolanean elkartasun uholde hau elikatzen".
Errigora proiektuaren ateak zabalik dituztela adierazi diete herritarrei, eta "modu ugari" dituztela parte hartzeko. Herriko boluntarioekin harremanetan jarri nahi izanez gero, errigora.lasarteoria@gmail.com helbide elektronikora idatzi behar dute.
Amaitzeko, eskerrak eman dizkiete berriro ere, "ezinbestekoak" direnei: "Euskaltzale, ekoizle, auzolangile, milaka kontsumitzaile... Guztioi, mila esker!".