Loraldiako kideek euren atari digitalean zehaztu dutenez, duela 50 urte "abangoardiaren esperimentazioan" murgildu ziren Mikel Laboa, Jose Luis Zumeta eta Artze anaiak; Ikimilikiliklik izeneko ikuskizuna plazaratu zuten orduan. Lan "harrigarri eta berritzaile" horretan diziplina ugari uztartu zituzten sortzaileek: poesia, ikus-entzunezkoak, artea, txalaparta... Bost hamarkada geroago, ekimen hori "berrikusi, berrasmatu eta bermoldatu" egin dute belaunaldi ezberdinetako puntako artistek, Edurne Azkarateren zuzendaritzapean. Berria egunkariak ikuskizun horren aurkezpenari buruzko albistean jaso zituen bere hitzak: "Hau ez da omenaldi bat, erreplika bat. Hau elkarrizketa artistiko bat da".
Urnietan dagoen Sarobe Arte Eszenikoen Gunean estreinatu dute berriki 'Ikimiliklik Vol.2' lana eta bertan izan da Intza Alkain Ibarguren aktore lasarteoriatarra, bera izango baita obra hori gorpuztuko duen artistetako bat. Aurrestreinaldia areto horretan bertan egingo dute, hilaren 12an. Bi egun geroago, berriz, Iruñeko Baluarte-n estreinatuko dute.