Aipatu ekimen hori testuinguruan jartze aldera, azalpenak eman dituzte sustatzaileek: "Autodromo egitasmoa Lasarte-Oriako zenbait gazteren eskutik jaio da. Bere helburua da herrian arte esparruan mugitzen den jendea batu eta eztabaidarako eta elkargunerako espazio bat ematea. Jakin badakigu herrian musikaz blai eta artean murgildutako jendea badagoela, baita kontzertuak, erakusketak eta hitzaldiak gustuko dituenak ere. Era berean, badira gazte asko kezkak partekatzen dituztenak arlo honetan, esate baterako: instituzioen trabak jaialdiak antolatzeko, norabide politiko eza duen arte eszena edota gazte langileon interesen arabera antolatutako espazioen falta. Horrexegatik, oraingoan mahai inguru bat antolatu dugu".