Emakume eta kuir taldea San Fermin jaietako aurrekari modura antolatu zen errugbi zazpiko txapelketan lehiatu zen Beriain, Nafarroan, hilaren 5ean. Lehen aldia zen taldeak horrelako lehiaketa batean parte hartzen zuena eta ederki gozatu zuten lehian eta elkarbizitzan.
Jokalariek gainera jardueraz baliatu ziren talde teknikoari egindako lana eskertzeko. Beltzak-eko anagrama eta jokalari guztien sinadura zuten baloiak banatzeaz gain, azpian irakurri daitekeen bertsoa eskaini zieten prestatzaileei:
| Lehenengo bilerara joan Eta ze harrera bertan Ez genekien rugbyaz Baina ez zegoen zertan Zubietako frontoian Lau friki astelehenetan Astiko lokatz putzutan Jendetza_asteazkenetan Hortzak erakutsiz hortzak Apurtu ditugunetan Taldea indartu dugu Hirugarren denboretan Errugbya bizipoza Izan da urte honetan Gu entrenatzeagatik Eskerrik asko benetan |
Era berean, Beltzak RTko zuzendaritzako kideek lerro hauen bitartez eskerrak eman nahi dizkiete taldeko jokalariei denboraldian zehar egindako ahaleginarengatik eta izandako konpromisoarengatik.
All Black-ekin lanean
Horrez gain, Aitana Lazkano jokalaria All Black teknifikazio saioetan izan da lanean, ekainaren 30etik hilaren 4ra.
Parte hartu duten jokalariek teknika berriak ikasi eta zituztenak ondu dituzte. Besteak beste, Zeelanda Berriko taldeko Anthony Tuitavake eta Mark ‘Zezena’ Allen izan dira prestatzaileak eta Espainiako Federazioko talde teknikoa ere izan da laguntzen.
Horrez gain, Lazkanok beste taldeetako kideak ezagutu eta harremanak sendotzeko aukera polita izan dela nabarmendu dute Beltzak RTko kideek.