Aipatu proposamen horretan jaso dituzten neurri zehatzetako batzuk hauek dira:
- Zaintza eredua birpentsatzeko prozesu parte hartzailea abiaraztea, herritarren, sektoreko profesionalen eta eragileen inplikazioarekin. Prozesu horretarako 20.000 euroko aurrekontua aurreikusi dute EH Bildukoek.
- Bakardade ez desiratuari aurre egiteko, gizarte dinamizatzaile bat kontratatzea, auzo zaintza eta boluntario sareak sortzeko helburuarekin.
- Desgaitasun eta mendekotasun egoeran dauden pertsonen arreta hobetzea: etxez etxeko laguntza zerbitzua indartu, langileen lan baldintzak hobetu eta zahartze aktiboa sustatzeko programak garatuta.
- Bazterkeriari eta babesgabetasunari aurre egiteko neurriak hartzea, besteak beste, harrera bulego integrala sortzea, errolda soziala eta harrera protokoloak ezartzea, eta babesgabetasun egoeran dauden haurrei zuzendutako programak sendotzea.
EH Bilduko kideek azpimarratu dute "erronka handiak" dituela aurretik udalerriak eta "zaintzaren esparruan eragiteko ahalmena" badutela udalek, baita Lasarte-Oriakoak ere. Norabide horretan, alderdi politiko horrek lanean jarraituko du "herritarren ongizatea erdigunean jartzeko".