Lore eta landareen, eta horiekin egindako askotariko produktuen salmenta puntu bilakatuko da Okendo plaza larunbat honetan, hilak 5. Arestian aipatu bezala, Behemendi elkartea, deKolore egitasmoa eta Lasarte-Oriako Udala dira antolatzaileak, eta ekimenaren nondik norakoak eman dituzte, prentsaurrean.
Ohi bezala, aurtengoa ere Okendo plazan aurrera eramango dutela jakinarazi dute arduradunek, 10:00etatik 14:30era. Gauzak horrela, bertaratzen direnek bi orduko tartea izango dute ekoizleek produktuak ikusi eta erosteko.
Antolatzaileek nabarmendu dute bezeroek ekoizleen eskuetatik zuzenean erosi ahal izango dituztela produktuak; ez hori bakarrik, ordea, horien guztien gainean jakin nahi dutena ere argituko diete.
Guztira hamabi postuk osatuko (horietako bat herrikoa) dute aurtengo azoka, honako hauek zehatz-mehatz:
- Zunoyar Lorategia (Oiartzun): barruko landareak, ornamentaziozkoak eta kolekziozkoak.
- Islaya (Oiartzun): sukulentak.
- Ortuberri (Iurreta): Baratzeko lore eta landareen ekoizpen eta salmenta.
- Urtinea Loreak (Usurbil): Barruko landareak, ornamentalak eta garaikoak.
- Aritzkungo Tienduka (Nfarroa): Eskuz egindako kosmentika naturala.
- Lore prentsatua (Donostia): Lore prentsatuak, eta lore lehorrekin egindako koadroak.
- Hazi ekologikoak (Lasarte-Oria): sukaladaritzarako eta tradiziozko erabilerara hazi eta belarrak.
- Sojo natura (Lekunberri): Eskuz egindako kosmentika naturala.
- Sara Letamendia (Aizarna): Eskuz egindako kosmentika naturala.
- Flores ganchillo (Nfarroa): Eskuz egindako bitxigintza.
- Tissus Artisautza (Atxondo): Banbu eta eukalipto oinarrietan kapsulatutako lore lehorrak.
- Josi Cactus (Ataun): Kaktusak lorontzietan, eta kaktusekin egindako terrariumak.
Alkateak adierazi du aipatu ekimenak tokiko ekoizleekin duen konpromisoa islatzen duela, eta familiekin jarduera ireki, parte hartzaile eta biziaz gozatzeko aukera eskaintzen duela.
Hala, Nuria Fernandezek gaineratu du gisa horretako ekimenek baserritarren eta ekoizle txikien lana ezagutarazten dutela, eta aldi berean, herriko merkataritza dinamizatzen laguntzen dutela.
Behemendi elkarteko eta deKoloreko ordezkariek, berriz, ekoizle txikien lana balioan jartzearekin batera, eskerrak eman dizkiote udala beste behin lore eta landareen azokari emandako babesagatik.
Txikientzako entretenimendua
Helduentzako salmenta postuez gain, haurrentzako entretenimendurako jarduerak ere izango dira aurten. 10:00etatik aurrera egurrezko jolasetan ibiltzeko aukera izango dute. Ostean, 11:30etik 12:30era, lore prentsatuekin eskulanak egiteko tailerra izango dute, eta hori amaituta, 12:30etik 13:30era, lore eta landareak nola landatu ikasiko dute.