Aieko Azpeitia Bengoak eta Hegoi Zabala Morenok osatutako Hernani 1 izan zuten aurkari.
Norgehiagoka serioa izan zen lau pilotariek jokatutako. Hala ere, urduri hasi zuten Lasarte-Oriako taldeko kideak neurketa eta aurkariak markagailuan aurreratu ziren.
Partida osoa atzetik egin arren, Intzako ordezkariek ez zuten amore eman eta azken txanpan erasora jo zuten. Ongi atera zitzaien ausardia eta itzulia eman zioten lehiari 16-18ko markagailuarekin amaituaz.
Ekialdeko txapelketako garaikurra eskuratuz, Errendimendu txapelketako bigarren fase ederrari eman diote amaiera Intzako gaztetxoek; ez dute neurketarik galdu.
Bakarkako lehiak
Udaberri eta Errendimenduko bikotekako txapelketak amaitzearekin bat, Intzako ordezkariek banakako txapelketak hasiko dituzte nagusiki.
Lehena kantxara ateratzen Itxaso Iparragirre izan behar zuen. Martxoaren 28an, Zazpi Iturriko Maria Balerdiren aurka jokatu behar zuen infantil mailako nesken txapelketako lehen jardunaldia, baina aurkariak ezin izan zuen neurketa jokatu eskuetan min zuelako.
Maila federatuan, Lau t'erdi txapelketa jokatuko dute eta lau pilotari izango dira lehian bi mailatan banatuta: Jon Pello Artetxe nagusien lehen mailan eta Peru Urdanpilleta, Haritza Diaz de Gereñu eta Beñat Olazabal, aldiz, nagusien bigarren mailan.
Errendimendu mailan bi lehia izango dira jokoan batetik banakako Berezko txapelketa eta bestetik binakako Udaberri txapelketa.
Lehenean Intzako Oier eta Irai Jauregi anaiak parte hartuko dute infantil eta alebin mailetan, hurrenez hurren.
Binakako lehiari dagokionez, eskolako gaztetxoek infantil 2. mailan izango dituzte bi bikote lehian eta alebin 2. maila bat.
Bai federatu, bai eskolarteko lehia ezberdinetan sistema bera erabiliko da. Multzotan banatuta pilotariek itzuli bateko liga jokatu eta lehen bi sailkatuek Gipuzkoako txapelketako kanporaketak jokatuko dituzte.
Eta hori guztiaz gain, Intzako arduradunek aurreratu dutenez, palako bikoteak Herriarteko gomazko palako lehian izena emateko asmoa dutela; maiatzean hasiko litzateke txapelketa.