Beltzek erronka ederrari egin zioten aurre. Hiru neurketa jokatu zituzten Katalunia, Valentzia eta Madrilgo ordezkarien aurka; bi partida galdu eta hirugarren berdindu zuten gazteek. Honakoak izan ziren emaitzak:
- CP Les Abelles Quality Brokers 45 - 0 Gesalaga Okelan Zarautz Beltzak RT
- CRC Pozuelo Rugby A 38 - 7 Gesalaga Okelan Zarautz Beltzak RT
- Barça Rugby 5 - 5 Gesalaga Okelan Zarautz Beltzak RT
Herriko lau ordezkariak Les Abellesen aurkako hamabostekoan izan ziren; gainerako bi partidetan, aldiz, Efrenek ez zuen zelaian hasi jokoa. Beltzek euren onena eman zuten zelaian eta Sanchez eta Arroyok entsegu bana egin zituzten, Pozuelo eta Barçaren aurkako neurketetan, hurrenez hurren.
CRC Pozuelok eraman zuen saria hiru aurkariak gailendu ostean eta Espainiako txapelketako finalerdietan izango da.
Gainerako emaitzak
Beltzen gainerako taldeek zorte ezberdina izan zuten. Ohorezko B mailako taldeak Blendio Cormoran RC Santander 11-32 garaitu zuen. Euskal Ligako II. mailako kideek ere Uribealdea 73-14 gainditu zuten. 16 urtez azpiko taldeak, aldiz, ezin izan zuen Universitario Bilbaorekin (66-45).
Apirileko lehen asteburuan, aldiz, Beltzen federatutako talde gehienek atsedena izango dute. Ez horrela eskolako kideek, 10 eta 12 urtez azpiko gaztetxoek Atsobakar kirol gunean izango dute topaketa hilaren 6an, 10:30etatik aurrera.