Maialen Chourraut herritarrak aurrekoan Australian egoteagatik huts egin bazuen ere, oraingoan K1 mailako garaile izan da.
Sailkapen proban laugarren postuan geratu arren, final zirraragarria bizi izan zuen herritarrak. Bigarren sailkatu zen Laia Sorribes (96,06) garaitu zuen Chourrautek 66 ehunekorengatik, bere marka 95,41 izan zen.
Horrez gain, egun bat lehenago, kayak kroseko kopako lehen hitzorduan ere parte hartu zuen herritarrak.
Berria den erlojupeko banakako proban emaitza ederrak eskuratu zituen. Bi jaitsiera jokatu zituzten eta lehengoan Chourraut izan zen nagusi; bigarrenean, aldiz, hirugarren postuan amaitu zuen.
Kayak kroseko txapelketan, aldiz, ezin izan zen finalerako sailkatu olinpiar kirolaria.
Selekzioko probak
Eslalom zein kayak kros jardunaldi hori eta hilaren 19an eta 20an, Orthezen (Frantzia) jokatuko diren Espainiako Eslalomeko hirugarren kopa eta Kayak kroseko bigarrena garrantzitsuak izango dira herritarrarentzat; Espainiako selekzioak aurten lehiatuko dituen nazioarteko txapelketetan parte hartuko duten kirolariak aukeratzeko baliatuko dituzte hautatzaileek.
Lehiaketa horien artean daude, Munduko Kopako probak, Parisen antolatuko den Europako txapelketa eta Australian jokatuko den Munduko txapelketa.