Ikastola bateko itxaron gela eta lau emakume. Komedia. Elementu horiek dira Amak obraren oinarriak. Denek hitzordua dute, baina Erregina Letizia ikastetxera gerturatu izanagatik, euren zita atzeratu egin da. Desesperatuta, emakumeak amatasunaren inguruan hitz egiten hasten dira. Oztopoak, buruhausteak, beldurrak eta kezkak; ezustean, elkarrizketak terapiaren antza hartzen du amatasunaren argi-ilunez solastatzeko, besteak beste, kontziliazioaz, arazo ekonomikoez, eradoskitzeaz edota haurrekin batera lo egiteaz. Landutako gaiak mardulak dira. Alabaina, bada obraren asmoa kontu potolo horiek umoretik lantzea, publikoa aretotik irribarretsu atera dadin. Hortaz, terapiaren itxurako giroaz baliaturik, pertsonaiek aholkuak partekatzen dituzte, taldean. Halaber, algarak pizteko printzak ere ageri izan dira pertsonaiek euren bizipenetatik ikasitako lezioen artean.
Oholtza gainean, orotariko amak irudikatu dira: amaordea, ama naturazalea edo espirituala, etxetik kanpo profesionalki lanean ari dena eta lehenerdia. Azken hori artista lasarteoriatar Intza Alkainek haragituta. Etxean jokatu du Alkainek, bere "eszenatoki kuttunenean", sei urterekin hasi zelarik Kukuka antzerki eskolan, kultur etxekoari estimu handia baitio. Osterantzean, berarekin batera, Iraitz Lizarraga, Tania Fornieles eta Oihana Maritorena aktoreak aritu dira. Manuel Lekuonako aretoa kasik beterik zegoelarik, publikoak txalo zarrapada izugarria eskaini die, emanaldi amaieran.
Lekurik gabeko esekitokia
Intza Alkain Amak obran ez ezik, bestelako saltsetan ere badabil. Hasteko, Pirritx, Porrotx eta Marimotots pailazoei herri omenaldia egiteko Maite Zaitut ikuskizunean parte hartuko du. Horrez gain, udazkenean, Manuel Lekuona Kultur Etxeko aretora bueltatuko da. Kasu honetan, Formol Laborategiarekin batera prestatutako obra eskainiko du: Heriotzak Eduardo du izena.
Ver esta publicación en Instagram
