Arratsaldeko bostak, gaztelekuan. Horrela hasi du GKSk jardunaldi antifaxista. Parte hartzaileak pixkanaka-pixkanaka gerturatu dira, batzuk taldean beste batzuk banaka. Berehala bete dute hitzaldia emateko prestatutako sala. Faxismoak hamaika aurpegi. Izenburuak dioenari jarraiki, faxismoa eta haren orotariko formak -matxismoa eta arrazakeria, besteak beste- izan dituzte hizpide koordinakundeko ordezkari hizlariak, eta egun berezi honen harira ekarritako gonbidatuek.
Hitzaldiak hitzaldi, helarazitako ideia nagusia faxismoa gizartean dugula izan da, nahiz eta pertsona edo erakunde batzuk errealitate horren aurrean "ikusezinarena" egin. Era berean, mintzalariek argi utzi dute eskuineko edota eskuin muturreko indar horiei aurre egin behar zaiela; "ideologikoki ala autodefentsaz baliatuta, hots, familiarteko zein lagunarteko afari batean entzundako iruzkin jakinen aurka eztabaidatuta edota pintada faxistak kalean ikusi eta ezabatuta. Ildo beretik, beharrezkotzat jo dute "behin betiko antolakuntza osatzea", gertaera jakinen aurrean biltzearen kontrara.
Solasaldia amaitu eta segidan, grafiti tailerrari lekua egin diote, Tximistarreta Parkean. Zuhaitzen artean plastiko gardena ipinita pintatu dituzte zenbait marrazki; inprobisatuta edota etxetik ekarritako zirriborroari begira. Bertara hitzaldira gerturatukoak ez ezik, jende gehiago ere hurbildu da, eta haietako batzuk grafitiarekin aritzera animatu dira. Giroa ederra izan da.
Bozgoragailutik entzundako doinuak aitzaki, ondorengo ekitaldiari begira "gorputza prestatzen" hasi dira. Izan ere, jardunaldia ixteko, kontzertu sorta eskaini dituzte artista askok, Siglo XX tabernan. Hasteko, rap saioa MKL, Astroboy eta Noctisen eskutik. Ondoren, Begi Gorri Selectorrek bere setari ekin dio. Harekin bukatu da Buruntzaldeko Gazte Koordinadora Sozialistak antolatutako jardunaldi antifaxista.
