Bisitariak gizakiaren eta naturaren arteko loturaren gaineko hausnarketa egitera gonbidatzen ditu Gotzon Huegun eskulturagileak, baita naturak zientziarekin duen loturaz jabetzera ere. Hain zuzen ere, arrazoi horregatik jarri dio Sinkronia izena aipatu proiektu horri.
Cristina Enea Fundazioan jarri ditu bere lanak ikusgai, hiru aretotan, eta ikusgai jarritako lanen bidez aipatu elementu horien (gizakia, natura eta zientzia) arteko elkarrizketa bat aurkezten du. Horrela, aipatu eraikin horretako aretoak bidaia emozional bat egiteko eszenatoki bilakatu ditu.
Martxoaren 16ra arte izango dute interesdunek bertaratu eta eskultorearen proiektua ikusteko aukera. Sarrera doakoa da, eta ondorengo egun eta ordutegian bisita daiteke: astelehenetik ostiralera, 09:30etik 18:00etara; larunbatean 10:00etatik 14:00etara eta 15:00etatik 19:00etara; eta igande zein jaiegunetan, berriz, 10:00etatik 14:00etara.
Izen bereko dokumentala
Erakusketa aitzakiatzat hartuta, horren izenburu bera duen dokumentala ere ondu du bere alaba HaizeakHuegunek, Kipi Kreate produkzio etxeko Gorka Ipiñazarrekin batera. Gotzonen lan prozesu osoa ezagutarazteaz gain, horren guztiaren atzean dagoen familia sostengua eta senideekin egin duen orain arteko bidea erakutsi dute.
Horri dagokionez, datorren astean argitaratuko du TXINTXARRI-k proiektuaren gaineko informazio pieza zabalagoa.