Energia eredu jasangarriago eta irisgarriago bat sustatze aldera, Lasarte-Oriako Udalak berriz ere zabaldu du Tokiko Energia Komunitateko (TEK) kide izatearen onurez gozatzeko kanpaina: "Ekimen honek aukera ematen die lasarteoriatarrei eguzki energiaren onurak izateko, inolako instalaziorik eta hasierako inbertsiorik egin beharrik gabe". Izena ematen duten aurreneko 25 bazkideek lagun bat animatzen badute, hiru hilabetetan ez dute kuotarik ordaindu beharko. Are gehiago, lau pertsona ekartzen dituztenek urtebetez parte hartu ahalko dute egitasmoan, doan.
TEK komunitatea eguzkiaren energiaren autokontsumo kolektiboaren barruko eredu berritzaile bat da. Horretan parte hartzen dutenek tokian bertan sortutako elektrizitatea partekatzen dute, argindarraren hileroko faktura murriztu eta trantsizio energetikoan lagunduta.
Interesa dutenek informazio gehiago jaso dezakete 900-85 96 95 telefono zenbakian, 10:00etatik 18:00etara. Halaber, proiektuaren xehetasun guztiak kontsulta ditzakete Lasarte-Oriako TEK komunitatearen atari digitalean.