Lasarte-Oriako Elkartasun Sarea martxan jarri duela iragarri dute. Donostiako Kaleko Afari Solidarioak ekimenarekin lankidetzan ariko dira eta hilabete bakoitzeko azken astearteetan elkartuko dira otorduak prestatzeko, hiri horretan ehun pertsona baino gehiagok jan dezaten. "Guztia modu autogestionatuan ari gara antolatzen, eta zuk ere egin dezakezu ekarpena, hala afarien prestaketara batuta, nola behar ditugun osagaiak emanda. Hain zuzen ere, larunbatean, hilaren 18an Okendo Plazan izango gara 11:00tatik 13:30tara informazioa banatzen eta behar diren lehengaiak jasotzen. Oraingoz, lekaleak, arroza eta olioa behar ditugu. Baita plastikozko poltsak, eta fruta kaxak ere. Bestelako ekarpenak ere ongietorriak izango dira", ohartarazi dute. Neguko arropa, manta eta tapakiak ere bilduko dituzte.