Ekainean Texas Lasartearra CFk alebin nesken lehen txapelketa antolatu zuen Lasarte-Orian. Lehiaketako arrakasta ikusirik, Gabonetan bigarren edizioa jokatuko da. Zehazki, hilaren 28an, arratsaldez. Texas Lasartearra taldeko Nora Navarro entrenatzaileak azaldu duenez, “aurreko ekainean egin genuen, nesken lehenengo txapelketa eta zoragarria izan zen, gainera arrakasta handia izan zuenez gabonetan esperientzia berdina pasatzeko ideia eduki genuen”.
Lehiaketaren helburua ere azpimarratu du talde zuri-urdineko kideak: “Emakumeen futbola sustatu nahi dugu, emakumeei kirol honetan garatzeko aukera gehiago eskaintzearen garrantzian sinesten dugulako. Beraientzat espresuki txapelketak sortzeak espazio lehiakorra izateaz gain, futboleko emakumezkoen talentua ikusgarri eta aitortzen laguntzen du”.
Horrelako txapelketek nesken futbolaren garapenean duten garrantzia ere nabarmendu du: “Ekitaldi hauek antolatuz, emakumezko jokalariei hazteko, beste batzuk inspiratzeko eta, azken finean, kirol honen garapena maila guztietan indartzeko plataformak aurkitzen laguntzen diegu. Futbolaren etorkizunerako aukera berdintasuna gakoa dela uste dugu, eta txapelketak dira hori sustatzeko biderik onenetakoa”.
|
Lehiaketa Era horretara, Texas Lasartearrako alebin taldeak Touring KE, Orioko FT, Añorga KKE, Real Sociedad SAD, Martutene KE, Intxaurdi KE eta Aiztondo NKK izango ditu aurkari txapelketaren bigarrengo edizioan. Taldeak lauko bi multzotan banatuko dira sailkatze fase bat jokatzeko. Lehen fase horren sailkapenaren arabera, taldeek final laurdenak jokatuko dituzte eta hortik aterako dira 3. postua zein finala jokatuko duten parte hartzaileen izenak. Neurketak aipatu hurrenkeran lehiatuko dira. |
|
Bi nesken talde
Aurten Texas Lasartearra CFk nesken bi talde ditu lehian, benjamin eta alebinak.
Alebinen taldeko entrenatzaileetako bat da Nora Navarro Saioa Carballorekin batera.
Aurten talde polita duela jakitera eman du eta bai entrenatzaileak bai jokalariak pixkanaka ikasten ari direla.
Futbol eskolako parte direnez, hilean behin jolasten dituzte partidak eta horiek prestatzeko, “entrenamenduak teknikoak eta dibertigarriak izan daitezen saiatzen gara, partidaren egunera gogotsu eta prestatuta iristeko”.
Hilaren 28an, denboraldiko lehen hilabeteetan egindako lana erakusteko aukera izango dute alebinen txapelketako bigarren edizioan.