Urtean zehar lasarteoriatarrak kalera irten eta herriko txoko politenei argazki egitera animatu eta bertako merkataritza sustatuz irudi onenak saritzea erabaki zuen duela urte batzuk Lasarte-Oriako Udalak.
Agustin Valdivia alkateak eta Sozioekonomia zinegotzi Nuria Fernandezek ezagutarazi dituzte irabazleak eta pantailan erakutsi dute hilabetez hilabete zein izan den argazki hautatua. Aurrean zituzten aulkietan zeuden haien guztien egileak, Tamara Galdin Carrasko izan ezin. Portada eta maiatzeko aukeratutako irudia atera zuenaren lekuan, aitak jaso du saria.
Batzuk beteranoak dira, aurreko urteetan ere aintzatetsiak izan baitziren. Urte batetik bestera saridun gisa errepikatzeaz gain, Yon Zugasti Simónek hiru sari eskuratu ditu oraingoan, Iñigo Mínguez de Pablos eta Javier Pastor Torrensek, aldiz, bina. Epaileek irudiak egilearen erreferentziarik gabe aukeratzen dituztela zehaztu du Fernandezek, horregatik, normala dela hainbat aurkeztu dituztenek sari bat baino gehiago jasotzea.
81 lagunek parte hartu dute, 41 gizonezkok eta 40 emakumezkok, guztira 109 irudi aurkeztuta. "Erabakia oso lehiatua izan da, argazki oso onak zeuden, kalitate handikoak", zehaztu du Fernandezek.
Udalak 1.250 euro banatu ditu erosketa bonuetan. Hauek izan dira irabazleak, hilabetez hilabete:
| Izen-abizenak | Hilabetea | Saria |
| Ángela Vicario Peña | Urtarrila | 100 euro erosketa bonutan |
| Yon Zugasti Simón | Otsaila | 100 euro erosketa bonutan |
| Iñigo Mínguez de Pablos | Martxoa | 100 euro erosketa bonutan |
| Javier Pastor Torrens | Apirila | 100 euro erosketa bonutan |
| Tamara Galdín Carrasco | Maiatza eta egutegiaren portada | 150 euro erosketa bonutan |
| Yon Zugasti Simón | Ekaina | 100 euro erosketa bonutan |
| Javier Pastor Torrens | Uztaila | 100 euro erosketa bonutan |
| Iñigo Mínguez de Pablos | Abuztua | 100 euro erosketa bonutan |
| Ramón Zugasti Marín | Iraila | 100 euro erosketa bonutan |
| Yon Zugasti Simón | Urria | 100 euro erosketa bonutan |
| Juan Ramón Chincilla Miguel | Azaroa | 100 euro erosketa bonutan |
| Olga Krasovska Dvydova | Abendua | 100 euro erosketa bonutan |