Hilaren 11n, lortu zuten sailkapena Intzako bikoteak; 22-5 garaitu zuten LAPKE 3. Neurketa laburra izan zen Loidibarren pilotalekuan jokatutakoa.
Etxeko bikotea nagusi izan zen neurketa osoan zehar. Artetxe eta Urdanpilleta serio jardun ziren kantxan eta sakearekin min egin zien etxeko aurrelariak aurkariei. Lasarteoriatarrek errenta handitzen zutela ikusirik, LAPKEko kideak urduritu egin ziren eta akats ugari egin zituzten.
"Bikote gaztea zen. Aurrelariak lehen partida zuen maila honetan eta jokoan nabaritu zen," adierazi dute Intzako kideek.
Gaztetxoak martxan
Gomazko pilotako Nagusien 3. mailako Mendizabal-Urruzola bikoak ligaxkako jardunaldi berria izango du Beotibar 1en aurka.
Hilaren 18-20ko asteburuan, aldiz, pilota eskolako gaztetxoak hasiko dira borrokan. Errendimendu txapelketari egingo diote aurre infantil eta alebinek.