Jai asteburuan murgildu da Sasoeta

Hiru eguneko jaia abian jarri dute Sasoetan suziriak eta Saustatxo elkarteari egindako omenaldiak. Andatza plazan bildu dira auzotarrak eta herritarrak pregoia entzun eta lehen jardueretan parte hartzeko. Ohi bezala, Uzturre plazan Los Chavales del Martija taldeak antolatutako kirol ekimenak aurrera eraman dituzte: zaku lasterketak, lokotxak, futbol jaurtiketak eta saskibaloikoak. Guztietan saiatzeko aukera izan dute haur eta gaztetxoek. Bien bitartean, Kilkerband txarangak Andatza plaza girotu du eta nahi zutenek txokolate beroa eta madalena askaritarako jateko aukera izan dute. Txaranga kale jiran abiatu denean, Porto Bello bakarlariak talde britaniar ezagunen abestiak eskaini ditu taberna ondoan. Afaltzeko etenaren ondoren, zezensuzkoa eta The Noise Makers-en txanda izango da.