Otsailean hasi zen errepideko lehiaketen denboraldia. Mailaren arabera, egutegi ezberdina izan dute kirolariek.
Eskolarteko kideek, esaterako, otsailaren 24an eman zioten hasiera eta hilaren 29an, larunbatarekin dute azken hitzordua. Maila horretan lehiatu da Andoaingo Txirrindulari Eskolan dagoen Xabat Martin herritarra, infantil mailan zehazki eta denboraldi ederra egin du gazteak.
Hainbat probatan parte hartu du Martinek –Andoain, Zegama, Segura, Urnieta, Zaldibi, Beasain edo Zizurkil– eta gehienetan podiumeko lehen mailara igo da herritarra. Maiatzean jokatu ziren Gipuzkoako txapelketan (maiatzak 5, Irun) eta Euskadiko Kirol Jokoetan (maiatzak 26, Sondika, Bizkaia) ere garaile izan zen Andoaingo Txirrindularitza Eskolako kidea.
Talde berean baina kadete mailan Luken Garmendia herritarra dabil lehian. Maila horretako txirrindulariek ez dute ekainean denboraldia amaituko, ordea; hurrengo hilabeteetan ere hainbat probari egin beharko diete aurre.
Oraingoz Lizarra, Zaldibar, Zumaia, Eibar, Agurain.... Gipuzkoa, Bizkaia, Araba zein Nafarroako lasterketetan parte hartu du txirrindulari gazteak; Euskadiko txapelketan ere izan zen maiatzaren 1ean.