Maiatzaren 25tik aurrera, zaletuek neurketa ezberdinetaz gozatu ahalko dute larunbata eta igande goizetan, Loidibarren pilotalekuan. Uztailaren 1ean, San Pedro jaien barruan, lehiatuko dira finalak.
Lehiakideek kirol arroparekin jokatu beharko dituzte partidak, finalerdiak eta finalean izan ezik; pilotari arropa zuria erabiliko da horietan.
Jokoan erabiliko diren pilotei dagokienez, pilota goxoarekin jokatuko dute. Antolatzaileak arduratuko dira materiala eramateaz, baina ez dira gerta daitezkeen lesio edo istripuen arduradun izango.
Izena emate epea ireki da. Inskripzioa egin nahi duten haur eta gaztetxoek astearte edo ostegunetan 17:30etik 18:00etara gerturatu beharko dute Michelin kirol guneko pilotalekura. Azken eguna hilaren 17a izango da.