Gorakada antzerki taldeak Kelonia eta itsasoa obra ekarri du Manuel Lekuona kultur etxera larunbat arratsaldean. Familiei bideratutako antzezlanak Kelonia dortokaren abentura kontatzen du. Ilargirik gau batean jaioko da hondartzan eta senak esango dio itsasora iristeko izarrek ur gainean egindako isla jarraitu behar duela. Hiriko argiek nahastuta, ordea, ezusteko lekura helduko da. Antzezlana antzoki baten atzealdean kontatutako istorioa da, biolinaren zuzeneko musikak lagunduta, eta bertan dauden elementuak baliatzen dituzte bi aktoreek pertsonaiak gorpuzteko. Esaterako, Kelonia bera, kapeladun biolina da, eta atrila, kaioa.
