Multzoetako fasean aurrez aurre egonda ziren Intza eta Legazpi, beraz, finala nola jokatu ongi pentsatua zuten. Lasarteoriatarrei jokoa aurrera eramatea komeni zitzaien; legazpiarrei, aldiz, kontrakoa, atzeaz jokatzea.
Intzako kideek ederki hasi zuten norgehiagoka eta aurrean nola min egin asmatuz 7-2 jarri ziren.
Agirrek eta Telleriak ez zuten amore eman, ordea; lasarteoriatarren pilotari neurria hartu eta bere pilotarekin atzean jokatzen hasi ziren. Intzakoak geldiarazten saiatu arren, aurkariek 13-8 eman zioten itzulia markagailuari.
Baina legazpiarren akats bat baliatuz, bigarren pilota bat atera ahal izan zuten lasarteoriatarrek. Pilota motelagoa zen eta ongi moldatu zen Intzako bikoa; Legazpia, aldiz, neurketatik kanpo geratu zen. Ondorioz, Artetxek eta Urdanpilletak aurrean jokatzeko aukera izan eta hutsik egin gabe 20-13ra iritsi ziren.
Azken tantoak borrokatuak eta nahasiak izan baziren ere, Intzako bikoak dejada batekin erabaki zuen neurketa, 22-15. Horri esker, sari nagusia Jon Pello Artetxe eta Peru Urdanpilletaren eskuetara joan zen.